ରାୟପୁର: ରବିବାର ଛତିଶଗଡର ବିଜାପୁରରେ ନକ୍ସଲ ଏବଂ ସୁରକ୍ଷା ବାହିନୀ ଯବାନଙ୍କ ମଧ୍ୟରେ ଗୁଳି ବିନିମୟ ହୋଇଥିବା ବେଳେ ମାଲକାନଗିରିରେ ପୋଲିିସ ବାହିନୀ ମାଓବାଦୀ ଲୁଚାଇ ରଖିଥିବା ଅସ୍ତ୍ରଶସ୍ତ୍ର ଓ ଗୁଳିଗୋଳା ଜବତ କରିଛନ୍ତି । ଏଥିରେ ୩ ଜଣ ନକ୍ସଲ ନିହତ ହୋଇଥିଆ ସୂଚନା ମିଳିଛି।
ସୂଚନାଯୋଗ୍ୟ ଯେ, ରବିବାର ପୁନର୍ବାର ଦୁଇ ପକ୍ଷ ମଧ୍ୟରେ ଗୁଳି ବିନିମୟ ଘଟିଛି । ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ ସୁରକ୍ଷା ବାହିନୀର ଏକ ମିଳିତ ଦଳ ବିଜାପୁର ଜଙ୍ଗଲରେ ନକ୍ସଲ ବିରୋଧୀ ଅଭିଯାନ ଚଳାଇବା ସମୟରେ ସେମାନଙ୍କ ଉପରକୁ ନକ୍ସଲମାନେ ଗୁଳି ଚଳାଇଥିଲେ। ଏହାପରେ ଯବାନମାନେ ତାହାର ପାଲଟା ଜବାବ ଦେଇଥିଲେ । ଏହି ମିଳିତ ଅଭିଯାନରେ ଜିଲ୍ଲା ରିଜର୍ଭ ଗାର୍ଡ (ଡିଆରଏଫ), ସ୍ପେଶାଲ ଟାସ୍କ ଫୋର୍ସ (ଏସଟିଏଫ) ଏବଂ ଜିଲ୍ଲା ପୋଲିସ ବାହିନୀ ସାମିଲ ଥିଲେ ।
ଅନ୍ୟପକ୍ଷରେ ମାଲକାନଗିରି ପୋଲିସ ସୂଚନା ପାଇ ମୋଟୁ ଥାନା ଅନ୍ତର୍ଗତ ଜିନେଲଗୁଡାଠାରେ ମାଟିତଳୁ ମାଓବାଦୀମାନେ ପୋତି ରଖିଥିବା ଅସ୍ତ୍ରଶସ୍ତ୍ର ଓ ଗୁଳି ଜବତ କରିଛି । ଜିଲ୍ଲା ଏସପିଙ୍କ ନେତୃତ୍ୱରେ ଡିଆରଭିଏଫର ଏକ ଦଳ ସେଠାକୁ ଯାଇଥିଲେ । ସେମାନେ ତଲାସୀ କରିବା ସମୟରେ ଜଙ୍ଗଲ ଭିତରେ ମାଓବାଦୀମାନେ ଲୁଚାଇ ରଖିଥିବା ଅସ୍ତ୍ରଶସ୍ତ୍ର ସ୍ଥାନ ଠାବ କରିବା ସହିତ ସେଠାରୁ ଏସଏଲଆର, ୫୨ଟି ଅଫୁଟା ଗୁଳି, ମୋବାଇଲ ଫୋନ, କିଟ୍ ବ୍ୟାଗ ଏବଂ ଅନ୍ଯାନ୍ଯ ମାଓସାମଗ୍ରୀ ଜବତ କରିଥିଲେ ।
