କୋଲ୍ଲାମ: କେରଳର କୋଲ୍ଲାମ ଅଞ୍ଚଳରେ ଏକ ଅଭାବନୀୟ ଘଟଣା ଘଟିଛି। ଏଠାରେ ଜଣେ ବ୍ୟକ୍ତି ନିଜ ପତ୍ନୀଙ୍କୁ କାର୍ରେ ଜୀବନ୍ତ ଜାଳି ଦେଇଥିବା ଜଣାପଡିଛି। ପୋଲିସ ଘଟଣାର ତଦନ୍ତ ଜାରି ରଖିଛି। ତେବେ ପ୍ରାଥମିକ ତଦନ୍ତରୁ ମିଳିଥିବା ସୂଚନା ଅନୁସାରେ ମଙ୍ଗଳବାର ବିଳମ୍ବିତ ସନ୍ଧ୍ୟାରେ ଜଣେ ବ୍ୟକ୍ତି ତାଙ୍କ ୪୪ ବର୍ଷୀୟା ପତ୍ନୀଙ୍କ ତାଙ୍କ ବ୍ୟବସାୟ ପାର୍ଟନରଙ୍କ ସହ ସମ୍ବନ୍ଧ ଥିବା ସନ୍ଦେହ କରି ତାଙ୍କୁ ଜିଅନ୍ତା ଜାଳିଦେଇଥିଲେ। ଏହି ଘଟଣାରେ ଅନ୍ୟଜଣେ ଗୁରୁତର ଆହତ ହୋଇଛନ୍ତି।
ମଙ୍ଗଳବାର ବିଳମ୍ବିତ ରାତିରେ ପଦ୍ମରାଜନ ନାମକ ବ୍ୟକ୍ତି ତାଙ୍କ ପତ୍ନୀ ଅନିଲାଙ୍କୁ ଅନ୍ୟଜଣେ ବ୍ୟକ୍ତିଙ୍କ କାରରେ ଯାଉଥିବାର ଦେଖି ଅନ୍ୟ ଏକ ଗାଡ଼ି ଦ୍ୱାରା ପିଛା କରି କୋଲ୍ଲମ ସିଟି ଇଷ୍ଟ ଥାନା ଅନ୍ତର୍ଗତ ଚେମ୍ମାମୁକ୍କୁଠାରେ ଅଟକାଇଥିଲେ। ସେଠାରେ ସେ ଗାଡ଼ିରେ ପେଟ୍ରୋଲ ଢାଳି ନିଆଁ ଲଗାଇ ଦେବାରୁ ତାଙ୍କ ଅନିଲା ଉକ୍ତ କାର୍ ଭିତରେ ଫସି ଯାଇଥିଲେ। ତାଙ୍କୁ ଉଦ୍ଧାର କରି ଡାକ୍ତରଖାନା ନେବା ବାଟରେ ତାଙ୍କ ମୃତ୍ୟୁ ଘଟିଥିବା ବେଳେ କାର୍ରେ ଥିବା ସହଯାତ୍ରୀ ମଧ୍ୟ ଗୁରୁତର ଭାବେ ଆହତ ହୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଏହି ଘଟଣା ପାଇଁ ପଦ୍ମରାଜନଙ୍କୁ ପୂର୍ବ କୋଲ୍ଲାମ ପୋଲିସ ଗିରଫ କରିଛି।
