ବାଲିଗୁଡ଼ା: ନୟାଗଡ଼ରୁ ଚୋରି ହୋଇଥିବା ମୋଟରସାଇକେଲ ବାଲିଗୁଡ଼ାରୁ ଜବତ ହୋଇଛି। ଦଶପଲ୍ଲା ପୋଲିସ୍, ବାଲିଗୁଡ଼ା ପୋଲିସ୍ ସହାୟତାରେ ବାଲିଗୁଡ଼ା ଥାନା ଅଞ୍ଚଳରୁ ୨୧ ଟି ଚୋରି ମୋଟରସାଇକେଲ ଜବତ କରିଛି ।
ସୂଚନାଯୋଗ୍ୟ ଯେ, ଗତ କିଛିଦିନ ହେବ ନୟାଗଡ଼ ଜିଲ୍ଲା ଦଶପଲ୍ଲା ଥାନା ଅଞ୍ଚଳରୁ ମୋଟରସାଇକେଲ ଚୋରି ହୋଇଥିବା ଦଶପଲ୍ଲା ଥାନା ଓ ମଧ୍ୟଖଣ୍ଡ ଫାଣ୍ଡିରେ ଅଭିଯୋଗ ହୋଇଥିଲା । ଏହି ଅଭିଯୋଗଗୁଡିକ ଆଧାରରେ ଦଶପଲ୍ଲା ପୋଲିସ୍ ତଦନ୍ତ ଆରମ୍ଭ କରିବା ପରେ ମୁଖ୍ୟ ଅଭିଯୁକ୍ତ କନ୍ଧମାଳ ଜିଲ୍ଲା ବାଲିଗୁଡ଼ା ଅଞ୍ଚଳରେ ରହୁଥିବା ସୂଚନା ପାଇଥିଲା । ଏହାପରେ ମଧ୍ୟଖଣ୍ଡ ଫାଣ୍ଡି ଏଏସଆଇ ଧିରେନ୍ଦ୍ର ପାତ୍ରଙ୍କ ନେତୃତ୍ବରେ ସାତ ଜଣିଆ ଟିମ୍ ବାଲିଗୁଡ଼ା ଆସିଥିଲେ। ମଧ୍ୟଖଣ୍ଡ ଫାଣ୍ଡି ଏଏସଆଇ ଧିରେନ୍ଦ୍ର ପାତ୍ରଙ୍କ ସୂଚନା ଅନୁଯାୟୀ ମୋଟରସାଇକେଲ ଚୋରି ରାକେଟରେ ମୁଖ୍ୟ ଅଭିଯୁକ୍ତ ଦଶପଲ୍ଲା ଥାନା ହରିଡ଼ାବାଡ଼ି ଗ୍ରାମର ଅଜୁ ନାୟକ ହୋଇଥିବା ବେଳେ ବାଲିଗୁଡ଼ା ପୋଲିସ୍ ସହାୟତାରେ ମୁଖ୍ୟ ଅଭିଯୁକ୍ତ ଅଜୁ ନାୟକଙ୍କୁ ଗିରଫ କରିବା ସହ ଅଭିଯୁକ୍ତ ଜରିଆରେ ବାଲିଗୁଡ଼ା ଓ ବାରଖମା ଅଞ୍ଚଳରୁ ୨୧ ଟି ମୋଟରସାଇକେଲ ଜବତ କରାଯାଇଥିଲା। ଏହାପରେ ଜବତ ବାଇକ ସହ ଅଭିଯୁକ୍ତକୁ ଦଶପଲ୍ଲା ପୋଲିସ୍ ନେଇ ଯାଇଥିବା ସୂଚନା ମିଳିଛି।
