ଭୁବନେଶ୍ୱର,ତା୧୧ା୯(ପିଏନଏସ): କେଫେରେ ଗଣ୍ଡଗୋଳ ସହ ଭଙ୍ଗାରୁଜା କରିବା ଅଭିଯୋଗରେ ଇନଫୋସିଟି ଥାନା ପୋଲିସ ବୁଧବାର ୪ ଜଣ ଅଭିଯୁକ୍ତଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନେ ହେଉଛନ୍ତି ସ୍ଥାନୀୟ ଥାନା ଅନ୍ତର୍ଗତ ପଥରଗାଡ଼ିଆ ଅଚଳର କାଳନ୍ଦୀ ବେହେରା (୩୮),କୃଷ୍ଣଚନ୍ଦ୍ର ବେହେରା (୨୩),ଦେବାଶିଷ ବେହେରା (୨୩) ଓ ଲକ୍ଷ୍ମଣ ବେହେରା (୩୨) । ଗିରଫ ଅଭିଯୁକ୍ତମାନଙ୍କ ବିରୋଧରେ ପୋଲିସ ହତ୍ୟା ଉଦ୍ୟମ କରିବା ଭଳି ସଙ୍ଗୀନ ମାମଲା ରୁଜୁ କରି କୋର୍ଟଚାଲାଣ କରିଥିବା ଜଣାପଡ଼ିଛି । ଗତ ୮ ତାରିଖ ସନ୍ଧ୍ୟାରେ ଅଭିଯୁକ୍ତମାନେ ଇନଫୋସିଟି ଥାନା ଅନ୍ତର୍ଗତ ବେଙ୍ଗଲୋର ଏକ୍ସପ୍ରେସ କେଫେରେ ଗଣ୍ଡଗୋଳ କରିବା ସହ ଅଭିଯୋଗକାରୀ ସାସ୍ୱତ ମହାନ୍ତି ଓ ତାଙ୍କ ବନ୍ଧୁମାନଙ୍କୁ ନିସ୍ତୁକମାଡ଼ ମାରିଥିଲେ ।
ସୂଚନାଥାଉ କି, ଗତ ୮ ତାରିଖ ସନ୍ଧ୍ୟାରେ ସାସ୍ୱତ ଏବଂ ତାଙ୍କ ବନ୍ଧୁ ଦେଶ ପ୍ରକାଶ ରାଉତ, ନତିକେତ ଦାସ ଓ କାଳୀ ପ୍ରସାଦ ଧଳ ଇନଫୋସିଟି ଥାନା ଅଚଳରେ ଥିବା ଉକ୍ତ କାଫେକୁ ଚା ପିଇବାକୁ ଯାଇଥିଲେ । ସେଠାରେ ୪ ଜଣ ବନ୍ଧୁ ବସିଥିବା ବେଳେ ହଠାତ ଅଭିଯୁକ୍ତ ଓ ତା\’ର ଅନ୍ୟସାଙ୍ଗମାନେ ଉକ୍ତ କେଫେକୁ ଆସିଥିଲେ । ଏହି ସମୟରେ ଅଭିଯୁକ୍ତମାନେ ସାସ୍ୱତ ବସିଥିବା ଟେବୁଲରେ ବସିବାକୁ ଜିଦ ଧରିଥିଲେ । ଏହାକୁ ଏନେଇ ଉଭୟପକ୍ଷ ପାଟିତୁଣ୍ଡ ହୋଇଥିଲା । ଏଥିରେ ଉତକ୍ଷିପ୍ତ ହୋଇ ମୁଖ୍ୟ ଅଭିଯୁକ୍ତ ଆଶୁତୋଷ ବେହେରା ଓ ସରୋଜ ବେହେରା ଅଭିଯୋଗକାରୀଙ୍କ ସହ ପାଟିତୁଣ୍ଡ କରିବା ସହ ସେମାନଙ୍କୁ ନିସ୍ତୁକ ମାଡ଼ ମାରିଥିଲେ । ପରେ କାଫେର ଅନ୍ୟପଟେ ଚାଲିଥିବା ଗଣେଷ ପୂଜାରେ ବସିଥିବା ନିଜ ବନ୍ଧୁମାନଙ୍କୁ ଡାକି ଦେବାରୁ ସେମାନେ ଏକତ୍ରିତ ହୋଇ ସାସ୍ୱତ ଏବଂ ତାଙ୍କ ବନ୍ଧୁମାନଙ୍କୁ ନିସ୍ତୁକମାଡ଼ ମାରିଥିଲେ । ଫଳରେ ସାସ୍ୱତ ଏବଂ ତାଙ୍କ ବନ୍ଧୁମାନେ ଗୁରୁତର ଭାବେ ଆହତ ହେବା ସହ କାଫେର ମଧ୍ୟ ବହୁ କ୍ଷତି ହୋଇଥିଲା । ତେବେ ଏହି ଘଟଣାର ମୁଖ୍ୟ ମାଷ୍ଟର ମାଇଣ୍ଡ ଆଶୁତୋଷ ଏବଂ ସରୋଜକୁ ପୋଲିସ ବର୍ତମାନ ପର୍ଯ୍ୟନ୍ତ ଧରିବାରେ ସଫଳ ହୋଇପାରି ନାହିଁ ।
