ଦୁବାଇ: ବଲିଉଡ ଅଭିନେତ୍ରୀ ଐଶ୍ୱର୍ଯ୍ୟା ରାୟ ବଚନଙ୍କୁ ଶ୍ରେଷ୍ଠ ଅଭିନେତ୍ରୀ ପୁରସ୍କାର ପ୍ରଦାନ କରାଯାଇଛି । ଏଠାରେ ଅନୁଷ୍ଠିତ ଏସଆଇଆଇଏମ ୨୦୨୪ରେ ଐଶ୍ୱର୍ଯ୍ୟା ଏହି ସମ୍ମାନ ଲାଭ କରିଛନ୍ତି । ମଣିରତ୍ନମ ନିର୍ଦେଶିତ ପୋନିୟିନ ସେଲଭାନ: ପାର୍ଟ ୨ରେ ନନ୍ଦିନୀ ଭୂମିକାରେ ଅଭିନୟ ପାଇଁ ତାଙ୍କୁ କି୍ରଟିକ୍ସ ପୁରସ୍କାର ପ୍ରଦାନ କରାଯାଇଛି । ଏହି ପୁରସ୍କାର ଗ୍ରହଣ କରିବାକୁ ଐଶ୍ୱର୍ଯ୍ୟାଙ୍କ ସହିତ ତାଙ୍କ ଝିଅ ଆରାଧ୍ୟା ମଧ୍ୟ ଦୁବାଇ ଗସ୍ତ କରିଥିଲେ । କବୀର ଖାଁଙ୍କ ନିକଟରୁ ମା’ ପୁରସ୍କାର ଗ୍ରହଣ କରୁଥିବାବେଳେ ଆରାଧ୍ୟା ଫଟୋଗ୍ରାଫର ବନିଯାଇ ମା’ଙ୍କ ଫଟୋ ଉଠାଇବାରେ ଲାଗିଥିଲେ । ସାଉଥ ଇଣ୍ଡିଆନ ଇଂଟରନ୍ୟାସନାଲ ମୁଭି ଆୱାର୍ଡସ (ଏସଆଇଆଇଏମଏ) ୨୦୨୪ ସେପ୍ଟେମ୍ବର ୧୫ରେ ଏଠାରେ ଆୟୋଜିତ ହୋଇଥିଲା । ପରେ ସେଦିନ ସଂଧ୍ୟାରେ ଐଶ୍ୱର୍ଯ୍ୟା ଏବଂ ଆରାଧ୍ୟା ଉଭୟ ରେଡ କାର୍ପେଟରେ ଚାଲିଥିଲେ । ଉତ୍ସବ ଆୟୋଜନ ସ୍ଥଳ ବାହାରେ ଭିଡ ଲଗାଇଥିବା ପ୍ରଶଂସକମାନଙ୍କ ସହିତ ଐଶ୍ୱର୍ଯ୍ୟା ସେଲଫି ନେଇଥିଲେ । ଉକ୍ତ ଚଳଚ୍ଚିତ୍ରର ଅଭିନେତା ଚିୟାନ ବିକ୍ରମଙ୍କ ପାଖ ସିଟରେ ଐଶ୍ୱର୍ଯ୍ୟା ଓ ତାଙ୍କ ଝିଅ ବସିଥିବା ଦେଖିବାକୁ ମିଳିଥିଲା । ସୂଚନାଯୋଗ୍ୟ ଯେ ଐଶ୍ୱର୍ଯ୍ୟା ପୋନିୟିନ ସେଲଭାନ ପାର୍ଟ-୨ରେ ଦୁଇଟି ଭୂମିକାରେ ଅଭିନୟ କରିଛନ୍ତି ।
