ପାଟ୍ନା: ବୁଧବାର ବିହାରର ମୁଜାଫରପୁରରେ ହେଲିକପ୍ଟର ଦୁର୍ଘଟଣା ଘଟିଛି। ବାୟୁସେନାର ଏହି ହେଲିକପ୍ଟରଟି ବନ୍ୟା ରିଲିଫ୍ ସାମଗ୍ରୀ ନେଇ ପକାଇବାକୁ ଯାଇଥିବା ବେଳେ ପାଣିକୁ ଖସିପଡ଼ିଥିବା ସୂଚନା ମିଳିଛି।
ସୂଚନାଯୋଗ୍ୟ ଯେ, ବିହାରର ମୁଜାଫରପୁରସ୍ଥିତ ଅରାଇର ୧୩ ନ ୱାର୍ଡ ଘନଶ୍ୟାମପୁରଠାରେ ବାୟୁସେନାର ଏକ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଛି। ଉକ୍ତ ହେଲିକପ୍ଟରରେ ୨ଜଣ ପାଇଲଟଙ୍କ ସମେତ ୩ ଜଣ କର୍ମଚାରୀ ବନ୍ୟାଞ୍ଚଳରେ ରିଲିଫ ସାମଗ୍ରୀ ବଣ୍ଟନ ପାଇଁ ଯାଉଥିଲେ। ତେବେ ସମସ୍ତେ ସୁରକ୍ଷିତ ଥିବା ଜଣାପଡ଼ିଛି। ଦୁର୍ଘଟଣା ପରେ ଏନଡ଼ିଆରଏଫ ଓ ଏସଡ଼ିଆରଏଫ ଟିମ ପହଂଚିବା ପୂର୍ବରୁ ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରିଥିଲେ।
ପ୍ରକାଶଥାଉ କି, ବୀରପୁରସ୍ଥିତ କୋଶୀ ବ୍ୟାରେଜରୁ ଅତ୍ୟଧିକ ପରିମାଣରେ ଜଳ ନିଷ୍କାଶିତ ହେବା ଯୋଗୁ ବିହାରରେ ବନ୍ୟା ସୃଷ୍ଟି ହୋଇଛି।
