ମୁମ୍ବାଇ : ବଲିଉଡ ଅଭିନେତ୍ରୀ ରାଣୀ ମୁଖର୍ଜୀ ବହୁ ପ୍ରତୀକ୍ଷିତ ସିନେମା ମର୍ଦାନୀ-୩, ୨୦୨୬ ରେ ପ୍ରେକ୍ଷାଳୟରେ ମୁକ୍ତିଲାଭ କରିବ। ମର୍ଦାନୀ -୨ ରିଲିଜ୍ ବାର୍ଷିକ ପାଳନ ବେଳେ ଏହା ଘୋଷଣା କରାଯାଇଛି । ଯାହାର ପୋଷ୍ଟର ସୋସିଆଲ ମିଡିଆରେ ଶେୟାର କରାଯାଇଛି । ଫିଲ୍ମଟି ଏପ୍ରିଲ୍ ୨୦୨୫ରେ ଶୁଟିଂ ଆରମ୍ଭ ହେବ। ଫିଲ୍ମର ସ୍କ୍ରିପ୍ଟ ରେଡି ଥିବାବେଳେ ଏହା ଦର୍ଶକଙ୍କୁ ଉପଯୁକ୍ତ ମନୋରଞ୍ଜନର ଖୋରାକ ଯୋଗାଇବ ବୋଲି ରାଣୀ କହିଛନ୍ତି । ଅନ୍ୟପକ୍ଷେ ମର୍ଦାନୀ -୧ ଏବଂ ୨କୁ ଦର୍ଶକ ଯେତେ ଭଲପାଇବା ଦେଇଛନ୍ତି ୩କୁ ମଧ୍ୟ ସେତିକି ଭଲପାଇବା ଦେବେ ବୋଲି ସେ ଆଶା ରଖିଥିବା ନାୟିକା କହିଛନ୍ତି । ଫିଲ୍ମରେ ରାଣୀ ଜଣେ ଦମଦାର ପୋଲିସ ଅଫିସର ଭୂମିକାରେ ନଜରକୁ ଆସିବେ । ତେବେ ମର୍ଦାନୀ-୧, ୨୦୧୪ରେ ରିଲିଜ ହୋଇଥିଲା । ଏହାର ଠିକ୍ ୫ ବର୍ଷ ପରେ ଅର୍ଥାତ୍ ୨୦୧୯ରେ ମର୍ଦାନୀର ଦ୍ୱିତୀୟ ସଂସ୍କରଣ ରିଲିଜ୍ ହୋଇଥିଲା । ଦୁଇଟିଯାକ ଫିଲ୍ମ ଦର୍ଶକଙ୍କୁ ବେଶ୍ ପସନ୍ଦ ଆସିବା ସହ ବକ୍ସ ଅଫିସରେ ରେକର୍ଡ କରିଥିଲା ।
