କଟକ : ଶନିବାର ବାଲିଯାତ୍ରା ଶେଷ ଦିନ ଥିବା ବେଳେ ଲକ୍ଷାଧିକ ଲୋକଙ୍କ ଭିଡ଼ ପରିଲକ୍ଷିତ ହୋଇଥିଲା। କାହିଁ କେଉଁ ଦୂରରୁ ବାଲିଯାତ୍ରା ପଡ଼ିଆକୁ ଲୋକଙ୍କ ଭିଡ଼ ଛୁଟି ଥିଲା। କିନ୍ତୁ ଏହି ସମୟରେ ବାଲିଯାତ୍ରା ପଡ଼ିଆରେ ପୃଥକ ପୃଥକ ଭାବେ ଦୁଇଟି ଅଘଟଣ ଘଟିଯାଇଛି। ସାଙ୍ଗମାନଙ୍କ ସହ କଟକ ବାଲିଯାତ୍ରା ବୁଲିବାକୁ ଆସିଥିବା ଯୁବକଙ୍କ ମୃତ୍ୟୁ ଘଟିଛି। ମୃତ ଯୁବକ ଜଣକ ହେଲେ ଘର ଗଞ୍ଜାମ ଜିଲ୍ଲାର କୁକୁଡ଼ାଖଣ୍ଡ ଅଂଚଳର ପ୍ରମୋଦ ନାଥ ସାହୁ। ଗତକାଲି ବାଲିଯାତ୍ରା ଶେଷ ଦିନ ଥିବାରୁ ପ୍ରମୋଦ ସାଙ୍ଗମାନଙ୍କ ସହ ବାଲିଯାତ୍ରା ଆସିଥିଲେ। ଏହି ସମୟରେ ପ୍ରମୋଦ ସାଙ୍ଗମାନଙ୍କ ସହ ମୌଜ ମସ୍ତି କରିବା ସହ ଫଟୋ ଉଠାଉଥିଲେ । ତାପରେ ହଠାତ ପ୍ରମୋଦ ଅସୁସ୍ଥ ହୋଇ ତଳେ ପଡ଼ିଯାଇଥିଲେ । ସାଙ୍ଗମାନେ ତାଙ୍କୁ ସଙ୍ଗେ ସଙ୍ଗେ କଟକ ବଡ଼ ମେଡ଼ିକାଲରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପ୍ରମୋଦଙ୍କ ମୃତ୍ୟୁ ପରେ ପରିବାରରେ ଶୋକର ଛାୟା ଖେଳିଯାଇଛି । ସେହିପରି ବାଲିଯାତ୍ରା ତଳ ପଡ଼ିଆରେ ଷଣ୍ଢ ଆକ୍ରମଣରେ ଦୁଇଜଣ ଯୁବତୀ ଆହତ ହୋଇଛନ୍ତି । ଆହତଙ୍କୁ ଚିକିତ୍ସା ପାଇଁ କଟକ ବଡ଼ ମେଡ଼ିକାଲରେ ଭର୍ତ୍ତି କରାଯାଇଛି।
