ଭୁବନେଶ୍ବର: ଇଟାଲୀରେ ଅନୁଷ୍ଠିତ ୮ ବର୍ଷରୁ କମ୍ ଫିଡେ ବିଶ୍ବ କ୍ୟାଡେଟ୍ ଚେସ୍ ଚମ୍ପିଆନସିପରେ ଭୁବନେଶ୍ବରର ସାତ୍ତ୍ବିକ ସ୍ବାଇଁ ରନର୍ସ ଅପ ହୋଇଛନ୍ତି। ଗତ ୧୭ ତାରିଖରୁ ଇଟାଲୀରେ ଆରମ୍ଭ ହୋଇଥିବା ଏହି ଚମ୍ପିଆନସିପରେ ମୋଟ ୧୧ ରାଉଣ୍ଡ ମଧ୍ୟରୁ ସାତ୍ତ୍ବିକ ୯ ପଏଣ୍ଟ ପାଇ ଦ୍ଵିତୀୟ ସ୍ଥାନରେ ରହିଛନ୍ତି। ଭାରତର ଅନ୍ୟତମ ଖେଳାଳି ଦିବିଥ ରେଡ୍ଡୀ ୯ ପଏଣ୍ଟରେ ପ୍ରଥମ ଓ ଚୀନ୍ର ଗୁଓ ଜିମିଙ୍ଗ୍ ୯ ପଏଣ୍ଟରେ ତୃତୀୟ ସ୍ଥାନରେ ଅଛନ୍ତି। ଏହି ପ୍ରତିଯୋଗିତାରେ ଭାରତରୁ ସମୁଦାୟ ୬ ଜଣ ଅଂଶଗ୍ରହଣ କରିଥିବା ବେଳେ ୨ ଜଣ ଶୀର୍ଷ ସ୍ଥାନରେ ରହି ଦେଶ ପାଇଁ ଗୌରବ ଅର୍ଜ୍ଜନ କରିଛନ୍ତି ।
ସାତ୍ତ୍ବିକଙ୍କ ଏହି ସଫଳତା ପାଇଁ କିଙ୍ଗ୍ସ ଚେସ୍ ସେଣ୍ଟରର ପ୍ରତିଷ୍ଠାତା ତଥା ତାଙ୍କର ପ୍ରଶିକ୍ଷକ ବିଶ୍ବଜିତ ରାୟ, ଟ୍ରିପଲ ସି’ ଚେସ୍ କ୍ଲବ୍ ସମ୍ପାଦକ ବିରଞ୍ଚି ନାରାୟଣ ସାହୁ, ଖୋର୍ଦ୍ଧା ଜିଲ୍ଲା ଚେସ୍ ସଂଘ ସମ୍ପାଦକ ଭବେଶ ମହାନ୍ତି, ଓଡ଼ିଶା ଚେସ୍ ସଂଘ ସମ୍ପାଦକ ଦେବବ୍ରତ ଭଟ୍ଟ, କାର୍ଯ୍ୟନିର୍ବାହୀ ସଦସ୍ୟ ସୂର୍ଯ୍ୟକାନ୍ତ ବିଶୋଇ, ସର୍ବଭାରତୀୟ ଚେସ୍ ସଂଘର ପୂର୍ବତନ ସହକାରୀ ସମ୍ପାଦକ ରଂଜନ ମହାନ୍ତି, କଟକ ଜିଲ୍ଲା ଚେସ୍ ସଂଘ ସଭାପତି ବିବେକ ତିବରୱାଲ୍, ଭୁବନେଶ୍ବର ଚେସ୍ ସଂଘ ସମ୍ପାଦକ ସୁବାଶିଷ ପଟ୍ଟନାୟକ, ବରିଷ୍ଠ ପ୍ରଶିକ୍ଷକ ଅର୍ଘ୍ୟଅର୍ପଣ ପରିଡ଼ା, ପ୍ରଶାନ୍ତ ଜେନା ପ୍ରମୁଖ ତାଙ୍କୁ ଶୁଭେଚ୍ଛା ଜଣାଇଛନ୍ତି।
