ନୂଆଦିଲ୍ଲୀ: ମାନବ ଚାଲାଣ ମାମଲାରେ ଜାତୀୟ ତଦନ୍ତକାରୀ ଏଜେନ୍ସି (ଏନ୍ଆଇଏ) ପକ୍ଷରୁ ଗୁରୁବାର ୬ଟି ରାଜ୍ୟର ୨୨ଟି ସ୍ଥାନରେ ଚଢ଼ଉ ହୋଇଛି। ରାଜ୍ୟ ପୋଲିସ ସହଯୋଗରେ ଏନଆଇଏର ବିଭିନ୍ନ ଟିମ୍ ସକାଳୁ ସର୍ଚ୍ଚ ଅପରେସନ ଜାରି ରଖିଥିଲେ। ସଂଗଠିତ ଚୋରା ଚାଲାଣ ନେଟୱର୍କକୁ ଉଚ୍ଛେଦ କରିବା ଉଦ୍ଦେଶ୍ୟରେ ସୂଚନା ପାଇ ଏହି ତଦନ୍ତ ଅଭିଯାନ କରାଯାଇଥିଲା। ତେବେ ସରକାରୀ ସୂତ୍ରରୁ ମିଳିଥିବା ସୂଚନା ଅନୁସାରେ, ବିଭିନ୍ନ ରାଜ୍ୟରେ ଚଢ଼ଉ କରାଯାଇ ସମ୍ବେଦନଶୀଳ ବ୍ୟକ୍ତି ଚୋରା ଚାଲାଣରେ ସମ୍ପୃକ୍ତ ଥିବା ସନ୍ଦେହ କରାଯାଉଥିବା ବ୍ୟକ୍ତି ଓ ସଂଗଠନକୁ ଟାର୍ଗେଟ କରାଯାଇଥିଲା।
ସୂଚନାଯୋଗ୍ୟ ଯେ, ଚୋରା ଚାଲାଣ ଏବଂ ବାଧ୍ୟତାମୂଳକ ଶ୍ରମରେ ନିୟୋଜିତ ଅପରାଧିକ ନେଟୱାର୍କର ଅନୁସନ୍ଧାନ ପାଇଁ ସମନ୍ୱିତ ସର୍ଚ୍ଚ ଅପରେସନ ଆରମ୍ଭ ହୋଇଛି। ଏନଆଇଏ ଏହି ମାମଲାକୁ ସ୍ଥାନୀୟ ପୋଲିସଠାରୁ ନିଜ ହାତକୁ ନେଇ ଅଭିଯାନ ଆରମ୍ଭ କରିଥିଲା। ସୀମାପାର ସିଣ୍ଡିକେଟ୍ ସହ ଜଡ଼ିତ ଏକ ବିଶାଳ ସଂଗଠିତ ନେଟୱାର୍କ ସନ୍ଦେହ କରି ଭାରତର ପ୍ରମୁଖ ଆତଙ୍କବାଦ ନିରୋଧୀ ଏବଂ ତଦନ୍ତକାରୀ ଏଜେନ୍ସି ଏନଆଇଏ ଏହି ମାମଲାକୁ ନିଜ ହାତକୁ ନେଇଥିଲା।
